Sunday, May 4, 2008

Posts of Blog rachanakar

Posts of Blog rachanakar

hasan jamal se yoonus khan kee batachit

Posted: 04 May 2008 08:57 AM CDT

(chitr men kamal sharma, hasan jamal aur yoonus khan. chitr - sabhara rediyonama)

shesh patrika ke sanpadak v prasiddh rachanakar shree hasan jamal se shree yoonus khan ne vividh bharati par shanivar 4 maee 2008 ko yooth eksapres karyakram men lanbi batachit kee. rachanakar ke pathakon ke lie prastut hai is behad dilachasp batachit kee rekarding.

batachit ka shurooaati kuchh minat ka hissa bijali band ho jane ke karan rekord nahin ho paya, jisaka hamen khed hai. bakee ka ant tak silasilevar batachit vakaee rochak hai v shravaniy hai.

batachit kee emapi 3 fail yahan se daunalod kara sunen

batachit ko niche die gae pleyar par sidhe hi aonalain sunen. sunane ke lie pleyar ke ple batan par klik karen.


sanbandhit :

hasan jamal ka tahalaka
hasan jamal ka vyangya
hasan jamal prakaran aur chaupat svami ka giddh drishti sandhana
hasan jamal ke paksh men
tootak tootak tootiya... aee jamal hoe

somesh shekhar chandr ka yatra sansmaran : evarest ka shirsh - samapan kisht

Posted: 04 May 2008 08:07 AM CDT



evarest ka shirsha
- somesh shekhar chandr

(pichhale ank se jari....)

vahan mujhe bachchon se jaisi aatmiyata aur samman mila tha aur vahan ikattha pariyon sarikhi khoobasoorat ladakiyon men, utana hi khoobasoorat unaka dil aur dimag dekhane ko mila tha use dekhakar main chamatkrit tha. lekin usase bhi bada chamatkar meri aankhon ke samane, badi tadad men, tebul par, saje, tarah tarah ke pakavanon aur vyanjanon ke roop men, ghata tha. apane yahan shadi byah jaise samarohon par, vyanjan banane men mahir kaitarars, do din pahale se, apani badi toli ke sath, din rat jutakar kam karate hain tab jakar itane veraiti ke vyanjan taiyar kar pate hain lekin us ladake ke ghar to, n hi koee kaitarar tha n hi malakin ka koee madadagar mujhe kahin dikhaee pada tha, bavajood isake vahan mujhe itane veraiti ke vyanjan taiyar mile, yah kaise sanbhav huaa? yah bat, kisi anaboojh paheli kee tarah, mujhe pareshan kie huee thi lekin mere bhitar kee yah paheli, ek din, khud bakhud sulajh kar, isaka bada sahaj sa hal mujhe samajha gaee thi.

us din mere khud ke ghar men isi tarah ke ek samaroh ka aayojan tha, aur usamen aamantriton kee tadad bhi thik vaisi hi thi. apane yahan, chhote se chhote samaroh ke lie log hafton pahale se, kaitarar, tent haus tatha khane pine ke saman tatha sabji bhaji, tel masale ikattha karane men vyast hue rahate hain, lekin mere yahan, yahan ke hisab se, itana bada aayojan tha fir bhi bachchon men kisi bhi tarah ka tanav ya vyastata nahin thi. ek din pahale bahoo beta, dukan gae aur kar men ladakar sara saman ghar le aae. aayojan ke din main kafi tanav men tha kaise bevakoof hain ye bachche inake ghar men itana bada aayojan hai lekin inhen isakee jara si bhi koee paravah hi nahin hai. us din main subah kafi jaldi uth gaya tha aur naha dhokar taiyar ho liya tha lekin bachche subah kafi der tak sote rahe the. dekh rahi ho n, aaj inake ghar men itana bada aayojan hai aur e log abhi tak tang pasare so hi rahe hain mainne patni se unakee shikayat kiya tha to, usane bhi, bachchon ke laparavah rahane kee bat par, unhen kosa tha lekin, jaisa bharatiy bapon kee, be-jaroorat jaisi baton ko bhi jaroori banakar, apane bachchon par bigadane aur apani bagharane kee aadat hoti hai, mera bigada mood dekhakar patni samajhee gayi thi ki main jaroor bachchon ko kuchh n kuchh ulta pulta bolane vala hoon. usane mujhe samajhaya tha ki jhoothamooth ka ham logon ko apana dimag kharab nahin karana chahie, karana aur sanbhalana unako hai isalie yah unaka hedek hai ham log isako lekar bekar ka kyon jhakhen. itana hi nahin subah kafi der so lene ke bad, jab donon uthe the to bhi, beta chay pikar sofe par ladakar pasar gaya tha aur bahoo rasoee men nashta banane chali gaee thi. ajib bat hai aaj inake ghar, sath sattar logon ka khana hai lekin usake lie yahan mujhe taiyari nam kee koee chij hi nahin dikh rahi hai oopar se ve itane sust aur beparavah hai jaise aayojan, inake ghar men nahin balki doosare ke ghar men hain aur e log host nahin, balki apane hi ghar men gest hokar pahunche hon.

haloki main unako kuchh bola nahin tha lekin bhitar hi bhitar, unakee laparavahi aur susti dekh, jal bhunakar khak huaa ja raha tha. lekin nirdharit samay se kafi pahale, hamare yahan jab karon men bhar bhar kar log pahunchana shuroo kie the to unake sath sirf unakee patniyan aur bachche nahin the balki sabake sath, bade bade bhagaunon men, ghar men taiyar, tarah tarah ke pakavan aur vyanjan bhi the. jab log use la lakar kichen men rakhana shuroo kie the to vahan itane bhagaune ikattha ho gae the ki utani badi rasoee, unhen rakhane ke lie chhoti padane lag gaee thi. aane valon men apani maon ke sath aae bachche to, dhama chaukadi machane ke lie gemaroom men chale gae the aur unake bap, hal ke kursi, sofe par lad pasarakar, gappe ladane men jut gae the lekin unakee patniyan kichen men, ghar se banakar late late jo saman thande hokar bemaja aur besvad ho jate, kuchh to, aise vyanjan talane, bhoojane aur pakane men jut gaee thin aur kuchh salad aur chatani jaisi chijen katane pitane men vyast ho gaee thin. koee bhi aurat ya mard, kisi doosare ke ghar ya rasoee men ghusega to use, us ghar ke bhitar, ya rasoee men, usakee jaroorat ke saman kahan kahan rakhe hue hai itana tak to, ghar vale se poochhana hi padega. lekin, yahan kichan men juti ladakiyan, apani jaroorat ke saman, kichen ke khanon se is tarah nikal nikal kar le rahi thin jaise vah unaka khud ka kichan ho aur sare saman, unhonne khud se sajakar rakha huaa ho. are vah....... ghar ka malik sofe par pasara logon se gappen lagane men juta huaa hai tatha malakin bina kam ke khali baithi hamajoliyon ke sath duniya jahan kee baten batiyane men mashagool hain. yahi hai bharatiy sanskriti men, hamare bujurgon kee samoohikata aur sahayog kee asal parikalpana, jo mujhe usake khanti svaroop men, bharat men to kahin dekhane ko nahin mili thi lekin amarika aakar n sirf mainne, apani aokhon ke samane use usake khanti svaroop men, ghatit hote dekha tha balki yahin par, mainne apani sanskriti men samajik samarasata tatha sah astitv ke lie, samoohikata aur sahayog ke madhyam se hamare manishiyon ne sabako ek mala men goonthane pirone ka jo bada saral sa aur karagar nuskha eejad kiya hai use bhi bade achchhe se jana tha.

apane ghar se, do tin ghar hatakar, ek dakshin bharatiy parivar rahata tha. ek din, unake yahan, ham saparivar khane par aamantrit the. apane ghar me, samaroh ke aayojan ke bad, main in logon ke aayojanon ke pichhe ka sara rahasy jan gaya tha. jo ladakee jis tarah ka vyanjan banane men siddhahast hoti hai, jab doosare ke ghar, kisi samaroh ka aayojan hota hai to vah usamen, us vyanjan ko banakar le jati hai main yahi samajhata tha. lekin jab mujhe apane padosi ke ghar par bhi usi tarah, badi tadad men, tarah tarah ke svadisht aur lajij vyanjan khane ko mila to main, fir soch men pad gaya tha. isake yahan to sirf mera hi parivar aamantrit tha aur mere yahan se koee usakee madad men bhi nahin pahuncha tha, fir bhi yahan, itane verayati ke lajij vyanjan, yah kaise sanbhav huaa? khane ke bad, ghar kee malakin kee tarif karate samay, mere man men aaya tha ki usase poochhoon, ki tumhare akele se, itane sare svadisht aur lajij vyanjan taiyar karana sanbhav kaise huaa? lekin mainne usase poochha nahin tha. ghar aakar, bahoo se yah bat poochha, to usane bataya tha ki, panch sat din pahale se hi log ise banane men jut jati hai aur bana banakar frij men rakhati jati hain isalie aisa sanbhav huaa.

hamare, ghar kee hi lain ke aakhir ke ghar men, ek malayali parivar rahata tha. un logon ne apane yahan ek din, saty narayan vratakatha ka aayojan kiya huaa tha. jo purohit katha sampann karavane ke lie vahan aae hue the ve dhoti kurta men the aur apani kar se aae the. ghar ka malik, kurta aur pili dhoti pahane tha aur malakin khoobasoorat banarasi sadi men, kisi dulhan kee tarah saji huee thi. pooja ka ghar unhonne kisi mandap kee tarah sajaya huaa tha. pandit ji jab pooja karavane baithe to us bade kamare men sabhi bachche tatha vahan jute aurat mard bhi aakar baith gae the. pooja ke pahale, sanskrit men mantr bolakar kul devata, gram devata se lekar tamam devi devataon aur digapalon tatha navagrah ke devataon ka aavahan karake unako aasan dekar, naivedy samarpit karane ke bad unaka dhoop dip se poojan kiya jata hai, isake bad satyanarayan katha ke panchon adhyay kahe jate hain aur ant men havan aur aarati hoti hai. pandit ji, devataon ke aavahan ke lie sanskrit ke jo bhi shlok bolate the ve, itane spasht aur shuddh hote the, sath hi unakee aavaj aur deh kee bhangima aisi hoti thi jaise sachamuch ke sare devata, aakash men baithe hue ho, aur pandit ji apane mantrochchar se unhen aakash se utarakar, vedi par aa birajane ka nivedan kar rahe ho. unake nivedan par, jab devata vahan aa utarate the to bade aadar ke sath ve unhen, unaka aasan dekar, unake sthan par baitha dete the. iha tishth? saty narayan katha ka panchon adhyay unhonne khud se nahin kaha tha. use kahane ke lie, vahan aae, jitane bhi bachche the, sabako unhonne panch grupon men bant diya tha. isake bad, unhonne, apane baig se, pahale se taiyar rakhi, char panch panno kee natthi kee huee, kaee parchiyan nikala tha aur ek ek adhyay kee parchiyan pancho grup men bant diya tha. un parchiyon men panchon adhyay ke sanskrit ke shlok, roman lipi men likhe hue the. shlok ke bad, unaka arth aur bhav unhonne angreji men anuvad kiya huaa tha. jis grup ke bachchon ko, katha ka jo adhyay kahane ko mila tha ve pahale sanskrit ka shlok poora padhate isake bad usaka angreji men arth kahate. jahan kahin bachche, sanskrit ke shlokon ke uchcharan men galati kar dete pandit ji bade pyar se, use tonk kar, usaka sahi uchcharann, sunakar usase fir se vah shlok bolavate. vahan jitane bachche grupon men baithe hue the unake sanskrit ke shlokon ka gayan sunakar lagata tha ki sabhi shlok pahale se hi, unhen yad hai aur un shlokon ke bhav aur arth ka bhi unhen achchha gyan hai. jitani der tak pooja hoti rahi, sabake sab bade bhaktibhav se vahan baithe usamen shamil rahe the. vahan par bachchon se lekar bado tak men jaisi tanmayata aur shraddha mainne poori pooja ke dauran dekha, vaisa bhav, bharat men mujhe n hi yahan ke purohiton men dekhane ko milata hai aur n hi, katha men pahunche logon men hi.

khana pina khatm karake, jab main pati patni, vahan se chalane ko hue, to main ghar ke malik malakin ko talashane lag gaya tha. malakin auraton ke bich ghoom ghoomakar unhen khilane men juti huee thi aur malik khane se nivritt ho chuke apane mitron ke bich baitha, gappen mar raha tha. mainne use bulakar, usase chalane kee ijajat liya tha to usane, mera nihora karate hue mujhase nivedan kiya tha bas ek minat apana samay hamen aur dijie ankal ji, bas ek minat, mujhase itana nivedan karane ke bad, vah bhagata huaa auraton ke bich vyast, apani patni kee banh pakadakar use khinchate ghasitate hamare samane le aakar khadi kar diya tha. main aur patni, agal bagal hi khade the. donon hamare, samane khada hokar apane donon hath apane sine par jod, aankhe band kar, hamari prarthana men kuchh budabudae the isake bad donon hath jode jode hi apane ghutanon par baith gae the aur usi tarah vahan bhi prarthana kie the isake bad donon jamin par dandavat lot gae the aur apane donon hath hamare panvon kee taraf badha kar jamin par kafi der tak usi roop men dandavat pade rahe the.

he bhagavan .......... main yah kya dekh raha hoon? dandavat padakar, pranam karane kee bat main kisse kahaniyon men bahut suna tha. chhath jaise parv ke mauke par, kaee aurat mardon ko, jamin par lot lot kar ghat kee taraf jate bhi dekha tha. dev sthanon ko jate raston par bhi dandiroop men, apane isht ke darabar men hajiri lagane jate logon ko bhi mainne dekha tha lekin vah sab, mahaj mere dekhane aur sunane tak hi simit tha. unhen dekhakar agar kabhi kuchh mere dhyan men aaya tha to bas itana hi ki ve, log, kisi uddeshy ke lie mannaten mane rahe honge aur unakee vah mannat poori ho gaee hogi isalie ve is tarah lot lot kar apane aaradhy ke pas ja rahe hai. isake siva, dandavat padakar pranam karane ke pichhe ka asal kya hai isake bare men kabhi mera dhyan hi nahin gaya tha. lekin jab us ghar men, pati patni donon dandavat hokar, apane hath hamare panvon kee taraf badhakar jamin par pad gae the to mera samoocha sharir ganagana utha tha aur mujhe laga tha mere bhitar ka chaitany, un donon kee taraf undelata chala ja raha hai. mere lie, yah bade ajib tarah ka aur alaukik anubhav tha. vahin par, apani sanskriti men, shreshthon aur mahatmaon ke panv chhookar tatha dandavat padakar pranam karake, unaka aashirvad lene ke pichhe ka asal matalab meri samajh men pahali dafa aaya tha. panv chhookar ya dandavat padakar pranam karane ka matalab, hain apane sampoorn ka samarpann, aisa samarpan jisamen do aatmaon ke bich chaitany ke pravah ke marg men, ahankar, jo ek badi divar banakar aa khada hota hai, usake visarjan ka ek bada saral aur karagar nuskha. ahankar ka visarjan hote hi jis tarah pani kee dhar dhalava kee taraf bahane lagati hai thik usi tarah chaitany, pranam karane vale kee taraf pravahit hona shuroo ho jata hai. chaitany ka pravah, ek alaukik ghatana hai, yah yachak aur data ke bich kuchh mangane ya dene ya len den jaisi duniyavi kriya nahin hai. balki donon ka, donon ko, apana sampoorn nyochhavar kar dene jaisa hai. duniya ke sabhi granthon men aur santon aur mahatmaon ne, eeshvar prapti ke lie jis samarpan kee bat kaha hai vah yahi samarpan hai. aisa hi samarpann, do logon ke bich, jab prem hota hai tab bhi dekhane ko milata hai. prem ke hone par, donon men se koee, kisi se n to kuchh mangata hai n hi kisi ko kuchh deta hai, balki donon hi donon par nyochhavar hue rahate hain, vahan donon men lootane aur lutane jaisi koee duniyavi kriya nahin hoti balki donon hi apana sanpoorn doosare par luta dene ko utavale hue rahate hain.

hamare ghar men ek nae mehaman ka aagaman hone vala tha. usake aane ke din, subah, abhi ham log soe hi hue the ki bete ne hamen aakar bataya tha ki mehaman ne apane aane kee soochana kee ghanti baja diya hai. usake aane kee soochana se vah, buri tarah uttejit tha. isake pahale, tisari pidhi ke prasad se dada dadiyon, nana naniyo kee pulak aur unaka kilakana, kudakana main dekh chuka tha lekin isaka anubhav, kitana alaukik aur romanchakari hota hai, vah apane ke aane par hi samajh paya tha. beta, hamen hadabadaya dekh, hamase kaha tha, aap log aaram se taiyar hoie, main patni ko lekar aspatal ja raha hoon aur vah use lekar aspatal chala gaya tha. usake jane ke bad, mainne dekha tha ki aspatal valon ne dilivari ke bad, jachcha aur bachcha donon kee jaroorat kee ek kit, tatha doosare kaee samanon kee list, bete ko, is hidayat ke sath pakadaya huaa tha ki vah unhen, aspatal aate samay, apane sath jaroor lekar aave. lekin beta, hadabadi men, sara saman, ghar par hi chhodakar, aspatal bhag liya tha. usake jane ke bad, patni ne mujhe bataya tha ki, bete ko jo saman lekar aspatal jana tha vah to yahi rah gaya hai. he bhagavan, ab main kya karoon? ek to mere lie yah ekadam anajani jagah, doosare bina kar ke yahan, ek kadam bhi ja sakana namumakin hota hai. ham log kar bhi chalana nahin janate aur agar chalana bhi janate hote to bhi, ham intaraneshanal draiving laisens, kahan se late. khuda n khasta hamare pas vaisa draiving laisens bhi hota to bhi yahan ke yatayat ka jaisa sakht kanoon hai sadakon par sab kuchh jitana svachalit aur haeetek hai, ek sau tis chalis kilomitar se kam kee raftar par sadakon par karen chalaee hi nahin ja sakati aur is sabase oopar, bharat men rod par baen chalane ka niyam hai jabaki yahan sab kuchh dahine chalata hai vaise men bharat ke mahir se mahir draivar tak, yahan kee sadakon par karen chalane kee himmat n kare, to ham jaise kamajoron kee kya majal jo yahan kar chalane kee bat soch bhi len. ham donon ke bich, saman ko lekar, abhi charcha chal hi rahi thi ki isi bich, hamare ghar kee ghanti ghanaghana uthi thi. lo aadhe raste se hi lautana pada n use? beta hadabadi men jo badi chook kar diya tha is par khijh men badabadata main, jakar daravaja khola tha to, mere ghar kee lain kee do ladakiyan mujhe namaste karake, bhadabhadati sidha bahoo ke bedaroom men ghusakar aspatal le jane vale samanon se bhari ataichi uthakar, bahar hal men nikal laee thin aur use kholakar usamen rakhe samanon ka, list se milan karane lag gaee thi. ataichi men, list ke mutabik do tin saman nahin the. itani subah, is samay kahan kahan ke stor khule honge, aur kis stor men, ve saman unhen milenge is par donon ne charcha kiya tha. isake bad ek ladakee, bina mujhase kuchh poochhe ya batae ya paise kee jikr ke, apani kar lekar, use lane ke lie daud padi thi aur doosari ladakee, sara saman ataichi men sahej kar apani kar kee pichhali sit par dala tha aur use lekar aspatal daud gaee thi. isake bad jo mere ghar kee tatha fon kee ghanti ghanaghanana shuroo huee thi aur logon ka, apane gharon se mere ghar aur vahan se fir aspatal ke bich, daudari shuroo huee thi to, jab tak jachcha, bachcha vapas ghar nahin aa gae the tab tak unakee daud chalati hi rahi thi. koee apane ghar se ham donon ke lie khana banakar pahuncha rahi hai to koee nashta koee tharmas bharabharakar chay la rahi hain, to koee bete bahoo ke lie, tifin men bharakar khana aur nashta aspatal pahuncha rahi hai. un logon ne, us samay apana ghar sanbhalane ke sath sath aspatal se lekar, ham donon tak ko jitani kushalata se sanbhalakar hamen nishchit kar diya tha aur is bat ka hamen jara sa kahi, aabhas tak nahin hone diya tha ki ve apane nahin hai use dekhakar main n sirf gahare tak abhibhoot tha balki buri tarah chakit bhi tha. bharatiy samaj men, is tarah ka bahanapa bhaeechara aur parivarikata, aaj kahan kahin dekhane ko milati hai?

sab kuchh achchha achchha nipat jane ke bad, ek din, dopahar ke samay main, apane ghar ke makanon kee katar ke charon taraf bane raste par tahal raha tha to, do agal bagal ke gharon kee malakinen, donon bharatiy, apane apane ghar se bahar nikal kar, dhoop senkati huee aapas men gapiya rahi thin. mujhe dekhakar donon apane hath jodakar mujhe pranam kee thi to main, unake karib jakar khada ho gaya tha. daraasal, yahan aakar, jo bharat main, apani aankhon ke samane gujarate dekh raha tha vah mere lie tha to purana hi, lekin usaka roop, arth aur mayane, ekadam naya aur anootha tha. vah isalie ki jo ladakiyan, bharat ke ladakon ke sath byahakar, yahan unakee bahuen banakar aaee hain, ve sabakee sab yunivarsitiyon, teknikal instityooton tatha prabandhan sansthanon se achchhi digriyan lekar nikali ladakiyan hai aur jin gharon se ve aaee hai unake man bap bhi achchhi hi haisiyat rakhate honge. bharat kee is star aur haisiyat vale gharon kee betiyon aur bahuon ko, main kafi karib se dekha tha. kaee men jis tarah ke thasake mainne dekhe, ise dekhakar mujhe laga ki jaise unhen koee surkhab ke par lage hue hon aur prithvi kee duniyadari se unaka koee matalab hi n ho. madarn aur apadet dikhane aur dikhane, ke nashe men koee koee itana choor huee rahati hai aur doosaron ke samane aisi shekhi bagharati hai jaise samoochi duniya unakee jootiyon tale ho. chay banana? na baba na, yah apane bas kee bat hi nahin hai, mujhe to yah tak pata nahin hai ki chay men chini dali jati hai ki namak. o gad... tum rotiyan senkati ho? senkogi hi, kyon ki tum bahin ji jo thahari, mere ghar ke mali, vo, vo, ghasite jaisa koee nam hai n tere bap ka aur teri man ka nam, meri naukarani ramapiyariya jaisa kuchh hai n? kisi ne agar unake samane, choolhe chauke ya duniyadari nibhane kee bat kar diya to us samay, unaka bigada munh dekhane layak hota hai. lekin yahan, jitanon ko mainne dekha sab, kee sab, ko aala darje kee man, patni aur kushal grihasthin dekha. aakhir e ladakiyan bhi to unhin ke bich se aaee huee hai aur yahan aane ke pahale aisa bhi nahin hai ki unake man bapon ne, unhen, kisi achchhe skool men, duniyadari kee, alag se talim dekar bheja ho. fir donon men itana bada antar kaise hai? yah saval mujhe bhitar hi bhitar pareshan kie hue tha. hamare ghar ke bagal kee donon padosinon ne, jab mujhe dekhakar, apane hath jod, mujhe pranam kiya tha to yah sochakar ki, apane prashn ka uttar janane ka mere lie yah ek achchha mauka hai kyon n main in donon se hi jo poochhapachhor karana hai, use karake, apane bhitar kee akulahat shant kar loon. isalie main unake thoda aur karib jakar rook gaya tha. aisa hai bete ki mere bhitar ka ek prashn, mujhe kafi dinon se pareshan kar rakha hai, use main tum donon se poochhana chahata hoon yadi tumhari ijajat ho to...........

poochhie ankal ji badi khushi se poochhie agar ham janate honge to usaka javab jaroor denge!
aisa hai ki, tum log, jo bharat se yahan byah kar aaee ho sabakee, sab achchhi padhi likhi aur achchhe gharon se bhi ho. tum logon kee jab shadiyan huee hogi to tumamen se koee abhi padh hi rahi hogi aur koee, apani padhaee khatm kee hogi. doosari tamam ladakiyon kee tarah, tum bhi duniyadari ke mamale men ekadam kachchi, anagadh aur anadi hi rahi hogi bavajood isake tum log, sabakee sab, itani achchhi man, patni aur kushal grihasthin hone ke sath sath, tarah tarah ke pakavan tatha vyanjan banane men itani siddhahast aur mahir kaise ho?

mera prashn sunakar donon men se ek ladakee, bade jor se thaththakar hansi thi aur thoda sochane ke bad, usane mujhe jo javab diya tha use sunakar mera man gadagad ho utha tha.

aisa hai ankal ji ki achchhi man, patni aur kushal grihasthin hona to ham ladakiyon kee sahajavritti hai. alave isake, hamari mane aur ghar parivar, hamare paida lene ke sath hi, sugadh grihini ke sare gunn, hamen hamari ghutti men pilana shuroo kar deti hai aise men, ham duniyadari ke mamale men anagadh aur anadi kaise rah sakate hain? rahi hamari pak kala men siddhahast aur mahir hone kee bat to use ham karate karate sikh jate hain aur jo hamen nahin aata use ham doosaron se pachhakar sikh liya karati hai.

dalas men vaise to chhote bade kaee mandir hai lekin jahan hamara ghar tha vahan se sath sattar kilomitar kee doori par, kafi lanbi chaudi jagah men ek bada vishal aur bhavy mandir bana huaa hai. vah mandir yahan ke logon ne apanon ke bich, chande ikattha karake banavaya hai. us mandir ka nirmann, dakshin bharat ke mandiron kee tarj par kiya gaya hai. kahate hain ki is mandir ko banane ke lie, dakshin bharat ke shilpi aur karigar, yahan aae hue the. mukhy mandir ke bhitar, balaji se lekar, bramha, mahesh, durga, kali, hanuman tatha doosare tamam devi devataon kee moortiyan sthapit kee huee hai. mandir se thoda hatakar, ek bada kanfrens hal bana huaa hai. samay samay par bharat se bade bade sant aur mahatma yahan padharate rahate hain aur jab ve padharate hain to isi mandir ke prangan men bane aavason men unhen thaharaya jata hai aur yahan ke bade kanfrens hal men unaka satsang aur pravachan hota hai. bharat ke sabhi pramukh tyoharon ka bhi yahan aayojan kiya jata hai, jisamen yahan ka bharatiy samuday badi, tadad men ikattha hota hai aur sab milakar use vidhivat manate hain.

jindagi chahe deshon kee ho, logon kee ya jiv jagat, kee sabaka sanchalan aur niyantran prakriti karati hai. usi kee yah satta hai aur vahi isaka badashah hai. apani samoochi satta ke kushal sanchalan aur us par majaboot niyantran ke lie, bhay ko usane, vajradand kee tarah apanaya huaa hai. ek ko, doosare ka bhojan banakar, har kisi ke pichhe, usake khane vale ko dauda rakha hai jhapatta maro, nahin mar sakate ho, to fareb karake khao anyatha bhookh tumhen kha jaegi. bhago, nahin bhag sakate ho to chhal, kapat aur pakhand karake, apani jan bacha lo, nahin to tumhare pichhe pada tumhara kal, tumhen kha jaega. yah kha lie jane kee dar, jis tarah sabake pichhe padakar, sabako bhishan roop se aatankit aur asurakshit karake rakhata hai yahi prakriti ka, apane samrajy ko sanchalit aur niyantrit rakhane ka, karagar hathiyar hai. choonki aadami bhi, prakriti ke samrajy ka hi ek jiv hai isalie doosaron dvara kha lie jane ka bhay aur apane jinda rahane ke lie doosaron ko kha lene kee bhookh, usamen bhi vaisi hi hai jaisa ki prakriti ke jiv jagat ke doosare sabhi jivon men hai. lekin aadami aur doosare jivon men ek bada fark hai aur vah fark yah hai ki, aadami doosaron se jyada chatur aur samajhadar hai. sath hi usamen, apani chaturaee aur samajhadari ke behatar istemal ka hunar bhi hai. apane isi hunar ke chalate, aaj vah n sirf, aadami bana huaa hai, balki prakriti ke bad, prithvi ka doosara sabase bada khiladi bhi ban baitha hai, aur usi kee tarah sabal, saksham aur samarth bhi. samajhadari kee apani isi khasiyat ke chalate, usane bhookh ko, usakee samagrata men samajha hai aur apani chaturaee se vah use, palakar apana tahaluaa bana liya hai. usane samajha hai ki bhookh, jo sabhi, utpaton aur upadravon kee jad hai vah usake pet se shuroo hokar dimag aur dil se bhi gahare usake, jivan ke mool tak apane panv pasare baithi huee hai aur use kha jane ke lie kisi bhoodharakar kar rakshas kee tarah, dahadati chinghadati usake pichhe lagi rahati hai, sath hi usane yah bat bhi achchhi tarah samajh liya ki bhookh itani prachand aur shaktishali hai ki usase ladakar ise parast nahin kiya ja sakata. isalie usane use, palatoo banana shuroo kar diya. sabase pahale usane tan aur pet kee bhookh ko, palatoo banane ka vigyan vikasit kiya aur use apane kaboo men karake ek bada aur shaktishali morcha fatah kar liya. fir man kee bhookh aur vahan se chalakar jivan ke mool par kundali marakar baithi bhookh tak ko samajhakar, use bhi palatoo banane ka vigyan vikasit kiya. lekin usane apani samajhadari se deh, man aur jivan ke mool men ladi baithi bhookh ko samajhakar, apani chaturaee ke bal par, us par kaboo rakhane ke vigyan ke vikas se, apane manushy hone ke jis bhi mukam par pahunch liya ho, lekin apane bhitar ke janavar ke, hinsa tatha jhooth fareb ka jal rachakar, apane shikar ko patakhani dekar ya fosakar use marakar kha jane kee apani vritti par kaboo nahin kar saka. isalie, aaj bhi bhitar se, vah janavar ka janavar hi hai, thik usi kee tarah histra, kunabaparast, kabaili tatha vaisa hi, aatankit tatha asuraksha se grast. aisa nahin hai ki vah apane bhitar kee is bhookh ko samajha hi nahin, samajha usane aur achchhi tarah se samajha aur ise samajhane ke bad, ise bhi palatoo banane ke lie usane, doosaron ke dvara khud ko kha lie jane ke dar aur aatank se mukti ke lie, usane, apane ko doosaron ka tatha doosaron ko apana poshak banane ke lie paraspar ke sahayog aur bhaee, chare, ke madhyam se sabako bhay aur aatank se mukt karane ka bada karagar, hathiyar, vikasit kar liya. lekin choonki yah hathiyar usaka khud ka nirmit tha isalie vah, poori tarah khalis aur shuddh hone kee bajae, bhitar se lekar bahar tak, isake reshe reshe men, banatoopana aur dogalapan samaya huaa tha, jisake chalate, usaka yah nirman poori tarah banavati aur dhokhe kee tatti banakar rah gaya. parinam isaka yah huaa, ki isase logon men paraspar vishvas badhane kee bajae, unhen, ek doosare ke prati jyada shankalu aur chaukanna rahane par majaboor kar diya. isilie aaj jindagiyan, chahe aadami kee ho ya deshon kee, prithvi ke doosare jiv jagat kee tarah hi, sab ek doosare se dare sahame rahate hain aur apane bhitar ke isi dar aur aatank ke chalate, ek doosare ko patak pachhadakar parast kar dene ke kam men jute rahate hain. aur is tarah samoochi prithvi par, har samay, ghoshit aur aghoshit yuddh chhida rahata hai. aisa yuddh, jisake lade jane ka n to koee nishchit maidan tay hota hai aur n hi usake lie pahale se nirdharit, koee kayada kanoon hi bana hai. choonki yuddh jitana hi sabaka uddeshy hota hai isalie apane pratidvandi ko gherakar, apane shikanje men le lene ke lie, sab apani apani bisaten bichha kar apani apani goten aur chalen chalate rahate hain, aur kisi ke thoda sa kamajor ya gafil padate hi, us par toot padate hain. jahan tak is sangram men jit ka saval hai to isake lie jaroori nahin hai ki pratidvandviyon men, apane deh se jo sabase jyada majaboot hoga vahi jitega. yahan jit usakee hoti hai jo apani sharir se chattani hone ke sath sath, apane dil aur dimag se bhi jivat vala hota hai jo apane pratidvandi kee kamajor nason ko achchhi tarah pahachanata hai aur use dabakar usase chhadi bulava leta hai. chakama dekar, use hakka bakka kar dene kee kala men mahir hota hai aur usakee majabootiyon ko bhedakar use ghutane tekava dene men saksham hota hai, vahi is yuddh men vijayi hota hai aur is sab men pravin aur samarth vahi ho sakata hai jo dhanabal janabal aur shastrabal ke sath gyan aur vigyan men prabal roop se sanpann hota hai.
amarika aaj isalie ativishisht aur advitiy nahin hai ki aarthik roop men vah, ati sampann desh hai ki usake pas tarah tarah ke nayab aur marak hathiyar hai tatha apane gyan aur vigyan se vah antariksh se lekar samudr kee gaharaeeyan tak nap lene men samarth hai. ki usamen itani jivatata hai ki durdant aur durgam tak pahunch lene tatha alanghy ko langh lene ka usamen adamy sahas hai, ki pravah ko manachahe dhang se modakar apani ichchhanukool pravahit kar lene kee usamen prabal kshamata hai. in tamam kshamataon aur dhanasanpada se sampann vah aaj prithvi ka akela desh nahin hai balki us jaisi sampannata aur kshamata ke aur bhi kaee desh isi prithvi par maujood hai. fir aisa khas kya hai, amarika men jisake chalate vah aaj duniya ka ativishisht aur advitiy ka darja prapt desh hai? is prashn par barikee se gaur karane par jo bat meri samajh men aaee vah yah in tamam visheshataon aur kshamataon ke sath sath amarika men mujhe jo sabase alag aur khas dekhane ko mila tha, vah tha prakriti ka apane samrajy ke sanchalan aur niyantran ke lie, maryaditon ke prati vinamrata tatha sahayog tatha amaryaditon ke prati poori tarah kroor aur nishthur ho uthane ka usaka jo vidhan hai thik usi se mel khata unaka samoocha sistam aur vidhan. aisa sistam, jisamen n to kisi laffaj aur khurapanchi ko laffaji aur khurapanch karane kee jara si bhi chhoot hai n hi kisi farebi ko fareb karane kee thodi si bhi jagah di huee hai. kunaba paraston aur kabailiyon ke lie jisamen sans tak lene tak kee gunjaish nahin hai tatha logon kee kamajoriyan aur nakaratmakataon ko bhunakar, apana ulloo sidha karane men mahir logon ko jahan thodi si bhi mohalat n ho, itana nishpaksh aur nishthur sistam ki yadi amarika ka rashtrapati bhi katar men khada ho, to use bhi apana nanbar apane par hi aur vah bhi joote utarane ke bad hi, aage kadam badhane kee ijajat di jati hon aur yadi usane bhi kisi sistam ke ullanghan kee gustakhi kar diya aur vahan tainat adana sa karmi, usakee banh pakad liya to, doosaron kee tarah hi use bhi, usake samane natamastak ho jana hai aur vah sab bhogane ke bad hi usakee mukti hai jo vahan ke vidhan men likha huaa hai. doosari badi khasiyat jo mujhe is mahan desh men dekhane ko mili thi vah tha yahan ke logon ka aatmavishvas! itana prachand aatmavishvas ki dushman se dushman desh ka hi koee kyon n ho, amarika kee dharati par panv rakh diya to vah apana hai. fir n to vah yahoodi hai aur n hi eesaee, ya hindoo ya muslim. n vah roosi hai aur n hi chini vah hai to sirf aur sirf amarikee. aur jis desh ke logon ke bhitar itana aatmavishvas bhara ho ki unhen har chehara, jis bhi roop ya rang ka ho, sabake sab apane aatmiy ke chehare sarikhe dikhen, to vah mahan dharati aur us dharati ke mahan bashinde, anupam aur advitiy ke alave, doosare kuchh ho hi nahin sakate.
(samapt)
------.
sanpark:

somesh shekhar chandra
se.ni. yooko baink adhikari,
dvara - aar. e. mishra,
2284/4 shastreenagar,
sulatanapur u.pr. 228001

somesh shekhar chandr ka yatra sansmaran : evarest ka shirsh - 6

Posted: 04 May 2008 02:11 AM CDT



evarest ka shirsha
- somesh shekhar chandr

(pichhale ank se jari....)

vaigyanikon kee ray men, teksas prant ka bada bhoobhag, pahale samudr ke niche tha. kalantar men samudr yahan se hat gaya aur jo bhoobhag usase nikala usi ka bada bhoobhag aaj ka teksas hai. yahan kee mitti jab sookh jati hai to vah kankad kee tarah sakht ho jati hai itani sakht ki hathaude se todane par bhi n toote aur jab us par, pani padata hai, tab bhi vah gond kee tarah lasalas aur sakht hi rahati hai. yahan kee mitti men koee jan hi nahin hoti. yahan ke bhoogarbh men pani bhi nahin milata. dalas itana bada shahar hai yahan par koee badi nadi ya pani ka bada shrot nahin hai yahan ke gharon ke oopar, apane yahan kee tarah, pani jama rakhane ke lie koee tankee bhi nahin bani hoti fir bhi ghar ke nalon men, chaubison ghante pani aata rahata hai. yah kaise sanbhav kiya in logon ne? yah bat mere lie kisi bade aashchary se kam nahin tha. lekin itani badi samasya ka inhonne bada aasan sa hal dhoondh liya hai. usaka hal in logon ne dalas shahar ke ird gird aath badi badi jheelon ke jarie kar liya hai. un jheelon men se, ek jheel ki kinare, ham log ghoomane gae the, yah jheel ek chhoti nadi ko bandhakar banaee gaee thi. jheel ko dekhane se nahin lagata tha ki vah koee jheel hai. usaka vistar itani door men faila tha ki usaka mujhe, kisi taraf ka bhi chhor dikhaee nahin padata tha. jahan tak najar jati thi sirf pani hi pani dikhata tha. yah jheelen barasat ke dinon men barasati pani se labalab bhar jati hain aur salabhar us pani ko saf karake log shahar ko saplaee karate rahate hain. jheelon ke bharane ka ek doosara bhi tarika, inhonne akhtiyar kiya huaa hai, vah hai shahar ka jitana bhi ganda pani nikalata hai use ve vaigyanik vidhi se itana saf kar lete hain ki jab vah poori tarah pine layak shuddh aur saf ho jata hai to use bhi ve jheelon men chhod dete hain. us jheel ka pani itana saf tha ki usake aath das fit ke niche kee jamin saf dikhaee deti thi.

yahan par, vik end par log, apana parivar lekar jheelon, nadiyon ke kinare ya jangalon kee taraf umad padate hain aur vahi par tanboo gadakar khate banate hain aur mauj masti karate hain. koee akela hota hai to vah, apani kar ke pichhe, vot ya nav bandh leta hai aur nadi aur jheel par pahunchakar, usamen boting karata hai. kaee log, nadiyon aur jheelon ke kinare aur jangalon men apane parivar ke sath chhuttiyan manane ke lie bada trelar rakhate hain jis par laitrin, batharoom, kichen aur sone ke kamaron ke sath poora ghar taiyar hota hai use lekar ve, jahan unaka man karata hai vahan nikal jate hain aur do tin din mauj masti karake vapas apane ghar laut aate hain. sabhi suvidhaon se lais trelar par bane makan, naven aur vot yahan par kirae par bhi upalabdh rahate hain. ek jagah se doosari jagah transafar hone par, ya kisi ko lanbe arse ke lie apana thikana chhodakar, doosari kisi jagah jana pad gaya to log, apane sabhi ghareloo saman bhade ke vaigan men band karake chale jate hain. malagadi ke dibbe kee tarah ke baigan, yahan par jagah jagah kirae par upalabdh hote hain. apane yahan kee tarah amarika men log, paisenjar trenon aur bason se aavagaman nahin karate. vaise yahan kee har siti, logon ke aavagaman ke lie kafi basen chalati hain lekin un bason men ekadh do painsejar, dekhane ko mil jaen thik hai nahin to dinabhar basen khali hi sadakon par danadanati daudati rahati hai. yahan par log tin char sau kilomitar tak ka safar, apani kar se hi karate hain yadi usase jyada door unhen jana hota hai to ve havaee jahaj se jate hain. akele dalas men do bade havaee adde hai, hamara makan jahan par tha usake oopar, se bahar se aane vale jahajon ka root hai, jis disha se havaee jahaj aa rahe hote the, us kone men dekhane se lagata tha, ki jaise vahan koee bil ho jisamen se, ek ke bad doosari aur fir tisari, isi tarah, sara din, vahan se jahajen nikal hi rahi hoti thi. unake nikalane kee jagah se, eyaraport tak ke aakash men, utarane vali jahajon ka tota laga rahata tha.

amerikee logon kee jindagi ka har kshetra, jahan itana haeetek aur sanbhrat hai, vahin unhin logon ke bich ek samuday aisa bhi rahata hai, jisake log, is aadhunik yug men bhi, aur suvidha sampann hone ke bavajood, apani jindagi, thik vaise hi jite hain, jis tarah kee jindagi, unake purakhe, atharahavin sadi men jiya karate the. is samuday ke logon ko yahan, aamis kahate hain. aamis samuday ke log angrej hi hain. atharahavin sadi men unake purakhe yahan aae the aur ve yahan par aakar badhaee giri ka kam karake apani jivika chalate the. aaj bhi unakee auladen, unhin kee tarah apane ghar, lalaten aur dhibari kee roshani se hi raushan karate hain. unhin kee tarah paranparik kapade pahanate hain kheti aur karigari, unhin ke jamane ke aujaron se karate hain aane jane ke lie ve apane purakhon kee tarah hi ghodon kee savari karate hain aur apane saman, ghoda, gadi men ladakar dhote hain. is samuday ke log apane bachche bachchiyon ko, shiksha ke lie, yahan ke skoolon men n bhejakar apani purani paddhati se unhen apane gharon men hi shikshit karate hain. ek din dalas se bahar kee, ek jagah, main ghoom raha tha to, aamis samuday ke kuchh logon ko, chari kee tarah ka, pashuon ka chara, ghoda, gadi men ladakar le jate dekha. is aadhunik yug men aur vah bhi amarika jaise desh men, un logon ko apani purani shaili men jivan jite rahane kee, unakee jid ke bare men soch sochakar main hairan tha. kyon hai aisi jid unamen, aisa ve apani mastamaulagi ke chalate karate hain ya unake sath aisa bura kuchhaghatit huaa tha, jisake chalate unhonne isi tarah jine kee jid kar rakha hai main, apane in savalon ka javab, khud se tatha doosare tamam logon se poochha tha lekin mujhe usaka, kisi bhi taraf se koee santoshajanak javab nahin mila tha.

yahan kee jindagi ke har kshetr kee aala darje kee vyavastha, yahan ke logon kee sanbhrantata aur charon taraf pasare vaibhav ko dekh kar jahan, ek taraf main chamatkrit tha vahin yahan kee kuchh baton ke bare men soch sochakar kafi hairan bhi tha. unamen se pahali bat yah thi ki yahan par, ghar banane men lakadi ka jitana andhadhundh istemal hota hai vah to hota hi hai yahan ke jitane bhi haee volt ke bijali ke tar hai ve sab lakadi ke bade oonche-oonche khanbhon ke jarie daudae gaye hain. lakadi ek aisi chij hai, jisaka nirman kisi karakhane men nahin kiya ja sakata. ise sirf jangalon ko katakar hi paya ja sakata hai. jangal men, bhi ek ped ko, usake ankhuvane se lekar poora ped banane tak men, varshon ka samay lag jata hai. vaigyanik aaj se nahin, varshon pahale se chilla rahe hai ki jangalon kee andhadhundh kataee se, prithvi nangi hoti chali ja rahi hai, jisake chalate ojon parton ka ksharan ho raha hai global varming badi teji se badh rahi hai jangali jiv jagat khatm hota ja raha hai aur jis raftar se yah sab ghat raha hai agar is par turant brek n lagaya gaya to yah samoocha plainet ek din, nark men tabdil ho jaega. hairani mujhe us bat ko lekar hai ki amarikee aavam itana chaitany hai ki vah kisi ko, mamooli anachar tak karane kee ijajat nahin deta. yahan ka vigyan itana aage hai ki ve log, nakshatron ke prithvi ke takarane kee avastha men jo tabahi yahan machegi, usake dar se, use antariksh men hi todakar nasht kar dene ya usaka rookh mod dene tak ka upay dhoondh lie hain lekin jangalon ke vinash se, samoochi srishti, jis teji se vinash kee taraf, dhakelati chali ja rahi hai is bat par, yahan ke log itane bekhauf, beparavah aur bekhayal kaise hain? aur yahan ke vaigyanikon ne aaj tak lakadi ka doosara koee vikalp kaise nahin khoja?

doosari bat kee hairani mujhe yahan ke, mote logon kee bhari tadad dekhakar huee hai. duniya ka sabase mota aur vajani aadami ho sakata hai, prithvi ke doosare, kisi aur hisse ka ho, lekin jitani badi, moton kee tadad, amarika men hai, utane mote log, shayad prithvi ke kisi bhi hisse men nahin honge. thik hai, amarika men log, apani sehat ko lekar kafi sajag hain. svasth rahane ke lie, kailori ke hisab se roj unhen, kya aur kitana khana chahie, yah bat ve achchhi tarah janate hain aur usi hisab se ve apana menyoo bhi rakhate hain. alave isake sharir kee atirikt oorja jalane ke lie, jagah jagah, vahan jim khule hue hai. taichoo aur yog kee shalaen hain aur fitanes ke lie, tarah tarah ke upakaran log apane gharon men lakar rakhate hain aur is par niyamit abhyas bhi karate hain. sharir man aur bhojan vigyaniyon kee yahan, badi tadad hai jahan se log, fit rahane ke lie, aise logon kee salahen bhi lete hain. log poori tarah fit aur chust rahen, isake lie, jo kuchh bhi chahie yahan vah sab kuchh hai aur prachur hai lekin aise log, jo bhojan bhatt hain, khane par baithate hain to, itana thoons thoons kar khate hain ki unhen apane marane tak kee paravah nahin hoti. jibhule, jinhen unakee pasand kee chijen dikhate hi unake munh se lar tapakane lag jaya karati hai aur dinabhar use hi ve chubhalaya karate hain. vilasi aur aalasi prakriti ke log, jinhen apane bistar se uthakar batharoom tak jane men bhi aalasy lagata hai, vanshanugat abhishap ke chalate bhasand aur apani deh dhote rahane ke lie abhishapton ke bare men yahan ke logon ne kyon nahin socha? prakriti apane jiv jagat ko svasth aur chust rakhane ke lie use aajivan daudae rakhati hai. aadami bhi, prakriti ke isi jiv jagat ke doosare jivon kee tarah ka hi ek jiv hain usane apane ko, palatoo bana liya hai thik hai lekin vah prakriti kee satta, usakee pranali aur tantr asvikar karake chahen ki jinda rah le aisa kar sakana usake bas ka nahin hai. yah bat vah achchhi tarah samajhata hain aur apani isi samajh ke chalate, vah prakriti ke sare halan-chalan, niti maryadaon aur tantron se bhidane aur bangavat karane kee bajae, natamastak hokar use sirodhary kar liya hai. aisa nahin hai ki amarikee, prakriti ke jiv, jagat se hatakar koee alag jiv hain, aur ve is bat ko samajhate hi nahin hain ki prakriti apane samrajy ke bhojan bhatton se lekar jibhulon tatha aalasiyon tak ko kaise chust aur duroost rakhati hai. ve yah bat achchhi tarah samajhate hain ki aadami bhag daud karake apane ko jitana chust aur fit rakh lega utana vah kisi banavati vidhi se nahin rah sakata hai. lekin itana sab kuchh janane samajhane ke bavajood, yahan kee vyavastha ne yahan kee sadakon par, paidaliyon aur saikiliyon aur daudakon ke lie, ek pagadandi bhar tak kee jagah nahin chhoda, aur isake chalate yahan ke, badi tadad men log, poori tarah, anaj se bhare bore kee tarah ho chuke hai. fark yadi donon men kuchh hai to sirf itana bhar ki, ek bore ko jahan kahin baitha do vah apani jagah lada baitha rahata hai aur doosara bora khud se chalakar, kar men lad leta hai, usase utarakar storon men ghoom leta hai, daftaron men apani sit tak karakhanon men kam karane kee jagah tak pahunch leta hai aur vahan se vapas lautakar apane ghar ke gairej se, chalakar apane bedaroom tak pahunch leta hai.

amarika pahunchane ke tin char dinon ke bad kee bat hai yah. ek din huaa yoon ki rat men jab main so raha tha to achanak se mere donon kanon men bade joron ka dard hone lag gaya tha. niyaee rat, bachche bhi so gae the. mere donon kanon ke bhitar, dhoy, dhoy karake jaise koee hathaude se chot kar raha ho aur har chot ke sath, itane tej ka dard ho raha tha, ki lagata tha ki unamen keelen thonkee ja rahi hai. amarika kee medikal, vyavastha ke bare men mainne pahale se sun rakha tha isalie bharat se chalane ke pahale, sir dard, bukhar, pet dard tatha doosari tamam sanbhavit bimariyon ke lie, elopaithik tatha aayurved kee goliyan aur chooran, daktar ke preskipsan ke sath, apane baig men dal liya tha. yahan eyaraport par talashi ke dauran, yadi kisi ke pas, bina daktari preskripsan ke, koee dava mil gaee to use lanbi avadhi kee jel ho jaegi aisa yahan ka kanoon hai. khair, mujhe dard se, pareshan, dekhakar is niyaee rat men bachche, pareshan ho uthenge yah sochakar, main bakse se pen kilar nikal kar kha liya tha lekin usaka, mere kan ke dard men koee asar hi nahin huaa tha. jab dard meri bardasht ke bahar ho utha tha to main bhagakar kichen men gaya tha aur vahan tokari men pade lahasun ke kuchh jave nikalakar usake tukade kiya tha aur in tukadon ko sarason ke tel men dalakar use kala hone tak khaulaya tha aur thanda karake vahi tel, apane donon kanon men dal liya. thodi hi der men mere kan ka dard kafi kam ho gaya tha. subah, jab main apane kan dard kee bat, bachchon ko bataya tha to, ise sunakar ve buri tarah chintit ho uthe the. chinta unhen is bat ko lekar huee thi ki yadi, mere kan, fir se dard karane lag gae to us avastha men v kya karenge? kyon- kya yahan koee kan ka daktar nahin hai? mainne bachchon se prashn kiya tha to unhonne, badi gamagin hansi hansate hue, mujhe jo sunaya tha, use sunakar, main hairan rah gaya tha. unhonne mujhe bataya tha ki, kan ka dard, koee imarjensi ka kes nahin hai ki aapako lekar aspatal bhaga jae. yahan aspatal vale, sirf usi marij ko dekhate hain jise turant bharti karake, ilaj karane kee jaroorat hoti hai. aapaka medikal inshyorens bhi nahin hai isalie koee praivet daktar bhi aapako jaldi dekhane ko raji nahin hoga. vaise bhi yahan, par daktaron ke yahan nanbar lagane par pandrah bis dinon men nanbar mil jae to kahie badi ganimat hai. aur apane yahan kee tarah, yahan ke storon se, bina daktari preskripsan ke ek sadharan sa malaham tak nahin kharida ja sakata. he bhagavan, yah kaisa desh hai, jahan aadami dard se chhatapata kar mar jae thik hai lekin usakee dava, n to aspatal vale karenge aur n hi bina apaintament ke koee daktar hi ise dekhane ke lie raji hoga. bachchon kee bat sunakar jahan ek taraf, yahan kee medikal vyavastha par mujhe bada kshobh huaa tha vahi doosari taraf, apane desh kee is vyavastha par naj ho aaya tha. bharat men vishvastar ke daktaron aur aspatalon se lekar yahan ke gali kooche tak men, jis tarah kee chikitsa suvidha, amir aur garib donon ke lie upalabdh hai aur vah bhi rat ya din ke kisi bhi pahar aur ghadi men, ise advitiy kaha jae to koee atishayokti nahin hogi. yahan par logon ko sardi, jukam siradard, pet dard tatha isi tarah kee chhoti moti bimari hone par, ve daktar ke pas jate hi nahin hai, is sabakee goliyan ve khud janate hain aur medikal storon se kharidakar kha lete hain aur change ho jate hain. isi tarah se bahut se log, bimar padane par daktar ke pas n jakar, medikal storavalon ko hi apani takalif batakar unase dava le lete hain aur use khakar changa ho jate hain. aayurved aur homiyopaith ke vaidy aur daktar jhad foonk ke jarie logon ko thik karane vale ojha guniya aur tootafat baithane kee kala men mahir log bhi yahan jagah jagah mil jate hain. dooradaraj ke ganv dehaton, tak men, jhola chhap daktar hi sahi, bina ilaj ke yahan koee mar jae aisa nahin hoga. isake alave, hamare yahan ghar ke aas-pas ugane vali ghas fooson aur jadi bootiyon se lekar, rasoee men adarak gol mirch, lahasun, pyaj, sonth, haldi ajavain, laung, ilaichi tak itane ghareloo nuskhe maujood hain aur har kisi ko usaka itana gyan hai ki kaee bimariyon ka ilaj to log, usi se kar lete hain. mainne bhi apane kan ka ilaj lahasun aur tel se kar liya tha aur jab tak amarika men raha tha fir mere kan men dard nahin utha tha. doosare din, ladake ka ek mitra, saparivar mere ghar aaya to ve log bhi mere kan ke dard kee bat sunakar, chintit ho uthe the. ladake ke mitr ne, use bataya ki, dalas men koee indiyan daktar hai jo hafte men kisi din, do ghante ke lie, meri tarah ke marijon ko dekhane ke lie baithate hain lekin kab aur kahan use nahin pata tha.

amarika jane ke pahale, vija banavane ke lie, amerikan embesi men, yah janane ke intajar men baitha tha ki, hamare vija kee darakhvast svikrit huee ya rijekt kar di gaee hai. lekin chhah mahine kee avadhi ke lie hamane vija kee arji diya huaa tha, aur hamen das sal ka vija de diya gaya tha, ise sunakar khush hone ke sath sath mujhe bada aashchary is bat ko lekar huaa tha ki vija ka darkhvast to mainne chhah mahine ke lie kiya tha aur mujhe vija das sal ka kaise de diya gaya hai? kauntar par baitha staf jab mujhe bataya tha ki aapako das sal ka vija diya gaya hai to usakee bat sunakar mujhe vishvas hi nahin huaa tha, mujhe laga tha batane vale ne jo kuchh mujhe bataya hai use ya to mainne thik se suna hi nahin ya yadi suna bhi hai to use samajh nahin paya. lekin yahi sach tha ki mujhe das sal ka vija diya gaya tha. vahan jitane log, vija kee lain men khade the, karib karib, sabako vija mil gaya tha aur isako lekar sab kafi khush the, lekin hamari hi lain men, mere pichhe, do tin aadamiyon ke bad, khade sattar pachahattar sal kee umr ke bich ke ek danpati ko, vija nahin diya gaya tha. hamen to vija nahin mila, chehare mohare aur pahanave odhave se sanbhrant dikhate ve bujurg, yah bat logon ko sunate samay ekadam se ro pade the. isake pahale ve donon kafi khush aur chust dikhate the lekin vija n milane se donon ekadam se bejan se ho gae the. khidakee se badi mushkil, se, apane ko ghasitate hue donon, ek kone men gae the aur dival se udhak kar, vahi kafi der tak khade rahe the. donon itana mayoos aur udas the jaise unaka sab kuchh loot liya gaya ho. aaj jab main apana yah sansmaran likhane baitha hoon to us bujurg jode ka udas, mayoos luta pita chehara meri aankhon ke samane fir se aakar, tang gaya hai. isake pahale, main kaee dafa apane bachchon ke pas ho aaya hoon lekin is dafa, mujhe to vija hi nahin mila. kitani chhatapatahat aur vedana bhari thi, us bujurg kee aavaj men. usakee aavaj men n to koee shikayat thi n aakrosh tha, tha to bas udasi, bebasi, aur tadap jaise ve donon badi ahak ke sath aur chhohate hue apane bachchon aur nati poton ko apani bahon men bhar lene ko daude hon, lekin unake pas pahunche, isake pahale hi unhen koee, kadakati aavaj men dapat diya ho, ai budhdhe, us taraf kahan munh uthae dauda chala ja raha hai? chal hat aur isi ke sath usane apane majaboot hathon se, donon ko gardan se pakadakar dhakiyata itani door le jakar patak diya ho jahan se unhen, apane bachchon ka fir kabhi didar hi n ho sake. yah bat mujhe abhi bhi hairan karati hai aur behad hairan karati hai.

hamare ghar se thodi hi door par, ek bildar, badi lanbi chaudi jagah, devalap karake usamen makan bana raha tha. ek din main tahalate tahalate usakee sait kee taraf chala gaya tha. us bade bhoobhag ke ek hisse men,, badi badi mashinen jamin ko samatal karane men lagi huee thi, doosare hisse men saikadon karigar makan banane men jute hue the, aur tisare hisse men, jamin kee plating karake chhod di gaee thi. un platon men jo plat bik chuke the ya bikaoo the isakee soochana, ke lie har plat par chhote chhote bord lagae hue the. unhin bordon ke bich, ek jagah ek kafi lanba chauda bord laga huaa tha jis par likha huaa tha ''amarika, yahan ke sabhi logon ke, chahe ve jis desh, jati, dharm ya sanpraday ke ho, bina kisi bhed bhav ke, nishpaksh bhav se, basane aur svatantr roop se apana jivan jine ka himayat karata hai. yadi kisi ke sath, koee, kisi bhi tarah ka bhedabhav karata hai to isakee shikayat ham tak jaroor karen'' us bord par angreji men jo likha huaa tha usake shabd, is samay mujhe thik thik yad nahin hai lekin aashay usaka yahi tha. amarikee sanvidhan men likhi yah bat, sirf, likhi hone tak hi simit nahin hai, balki us mahan desh men char panch mahine rahakar mainne jo kuchh dekha aur samajha hai vah yah ki yahan par, chin, roos, bharat, japan, midil eest, ijarayal afrika maiksiko arjenntina se lekar prithvi ke har desh, jati dharm aur sanpraday ke log, thik vaise hi rahate hain aur naukari, vyapar karake apana jivan yapan karate hain jaisa, yahan ke shuddh amarikee karate hain. yahan par mujhe n to kisi sarakari ejensi kee taraf se, n hi yahan ke praivet pratishthanon ke logon, ya jivan ke doosare kisi bhi kshetr men, kahin bhi desh, jati ya dharm ke aadhar par, logon men kisi bhi tarah ka poorvagrah, eershya, dvesh ya bhedabhav dekhane ko mila. yahan ke eyaraport se lekar, dukanon, bajaron, parkon tak men mera, jitane bhi logon se samana huaa, sab kafi suhrid, aatmiy aur sahayogi dikhe. yahan par jis tarah, jagah jagah charch hain, usi tarah mandir, masjid, math aur sinegag hai aur log apani apani aastha ke anusar, apane poojasthalon men jakar pooja archana karate hain aur apani manyataon aur paranparaon ke anuroop apana jivan jite hain. dharm, manyata aur aastha ko lekar yahan ke logon men, kahin kisi tarah ka takarav ho, aisa mujhe kahin nahin dikhaee diya tha aur jis chain aur befikri ke sath prithvi kee sabhi naslen aur bhoobhag ke log, amarika men rahate hain use dekhakar amarika ko prithvi ka sachcha kasmopolitan desh kaha jae to atishayokti nahin hogi.

garib aur garibi yani ki abhav aur jillat, prithvi ke har kone men maujood hai. han yah bat digar hai ki, kahin par yah kam aur bahut kam, to kahin par bahut jyada hoti hai. sthan aur kshetr vishesh men isake, karak, svaroop aur prakar, alag alag ho sakate hain, lekin prithvi ka koee bhi kona, isase achhoota nahin hai. amarika jaise sampann desh men bhi garib aur garibi hai. yahan kee sarakar, in garibon ke rahane aur bhojan ka samuchit prabandh kar rakhi hai bavajood isake log yahan, bhikh mangate hain aur apane din kisi pul ke niche sharan lekar, ya badi badi attalikaon ke, hitaron se garm hava nikalane vali soorakhon par sokar, apani sard raten gujarate hain. ek din akhabar men padha ki akele dalas shahar men, panjikrit bhikhariyon kee sankhya aath hajar chh sau battis hai.

dalas men jis pustakalay ke chauthe talle se chhupakar, hatyare ne kainedi kee hatya kiya tha, us pustakalay ko, sangrahalay bana diya gaya hai jisamen unake jivan se sanbandhit, tamam dastavej, foto, aadiyon aur bijuvals ka vishal sangrah hai. jis samay kainedi rashtrapati the kyooba men, roos aur amarika donon, aamane samane ho gae the aur donon ke bich paramanu yuddh ka khatara paida ho gaya tha. lekin kainedi aur kushcheb ne milakar, donon deshon ke sath sath, samoochi duniya ko jis mahavinash se bachaya tha usake pichhe kee gatividhiyan, diplomaisi ke dastavej, aadiyo bijual vahan rakhe hue hai. kar men baithe kainedi par goli lagane kee khabar kitani der bad, rediyo aur ti0vi0 par prasarit huee thi, vah aavaj aur drishy aur use sun, dekhakar gamagin aur rote bilakhate log, us samay vahan maujood fotografaron ne tatha doosare tamam logon ne jin kaimaron se us drishy kee tasviren liya tha ve kaimare tatha usakee tasviren vahan rakhi huee hai. hatyare ne jis bandook se goli chalaya tha tatha jo goli kainedi ko lagi thi vah bhi vahan rakhi huee hai. ek vijitars buk bhi vahan rakhi huee hai jisamen yadi koee chahe, to apani ray aur vichar likh sakata hai. us mahan vyaktitv ke bare men bijitars, buk men, mainne bhi apani ray hindi men likha tha.

dalas shahar men, jis jagah sangrahalay hai usi se sata, tin sau sal purana lakadi ka bana, ek kothari ka chhota ghar hai. usakee chhat dhalavo hai aur vah bade khapade se chhaya huaa hai. yah ghar us samay ka postaaafis tha, jise logon ne, dharohar ke roop men surakshit kar rakha hai. usake charon taraf, kafi lanbi chaudi jagah men ghas ugaee huee hai. ham log us dharohar ko dekh rahe the to kafi lanba chauda paintis se chalis sal kee umrr ke bich ka ek kala aadami, dharohar ke pichhe kee taraf se achanak nikalakar ham logon ke pas pahunch gaya tha aur sar, van dalar plij sar, sar kahata huaa, hamare ekadam karib pahunch gaya tha. use dekhate hi ladaka, ham logon ko turant vahan se bhag lene ko kahakar, khud bhi vahan se bhagane lag gaya tha. pahale to meri samajh men hi nahin aaya tha ki ek bhikhari hamare lie aisa kaun sa bada khatara ho sakata hai ki usase, darakar ham logon ko apani jan bachakar bhag lene kee jaroorat pad jae, lekin jab ham, vahan se bhagakar surakshit jagah pahunch gae to ladake ne hamen bataya tha ki yahan ke badamash, isi tarah, sar sar karate, logon ke pas pahunch jate hain aur achanak se, pistaul nikalakar, unake pas jo kuchh milata hai use chhinakar chanpat ho lete hain.

dharohar ke pas hi, ek sadak par do tin baghghee vale khade the. unakee baghghiyan kafi sanbhrant dikhati thi aur har baghghee men do ghode jute hue the. ve log yahan aane vale paryatakon ko, baghghee men baithakar yahan ke darshaniy sthalon ka bhraman karavate the. dalas shahar men hi ek kisan market hain jahan, yahan ke kisan, sabjiyan, anaj, fal doodh, mans lakar bechate hain. jis din ham vahan ghoomane gae the, kisan market band tha isalie ham vahan nahin gae.

yahan par jitane bhi park, bagiche aur dekhane layak jagahen hain sabaka prabandh, us kshetr kee siti ke jimme hota hai. siti, un jagahon ko, itana achchhi tarah sanvarakar aur suroochipoorn dhang se susajjit karake rakhati hai ki use dekhane ke lie har din khasi tadad men log vahan pahunchate hain. yahan par har dekhane vali jagah ke bhitar jane ke lie das se pachas, sau dalar tak ka pravesh shulk nirdharit hota hai. jis tarah vahan bhid jutati hai is pravesh shulk se n sirf, us jagah ke rakharakhav ka sara kharch nikal aata hai balki vahan se, har siti ko moti aamadani bhi hoti rahati hai. dalas shahar se kuchh door, ek bahut bada udyan hai. ek din ham log saparivar vah udyan dekhane ke lie gae. socha yah gaya tha ki do tin ghante vahan gujarakar laut aaenge lekin udyan jitani door men faila tha aur usaka har kona doosare se hatakar aur kisim kisim ke ped paudhon se bhara huaa tha, bich bich men bahata jharana, gahagahate foolon kee kyariyan, ek hi kyari men ek hi kism ke foolon ke alag rangon ke sanyojan se vahan jaisa saundary bikhara pada raha tha, usake sammohan men ham aisa khoe ki sham kab ho gaee, hamen pata hi nahin chala. ek jagah par unhonne ped paudhe aur foolon ka ek mor banaya huaa tha. mor ek oonche tile par baitha huaa tha aur usakee poochh jamin par kafi door faili huee thi. mor kee kalagi, chonch, aankh, gardan aur daine, jhadinuma paudhe ugakar banaye hue the aur jamin par faili usakee poochh aur gol gol paridhi ke bich badi tikali ke aakar ke usakee poonchh ke bunde, gahare nile aur baigani rang ke foolon se, aisa spasht hokar ubhar raha tha ki use dekhane se lagata tha ki jaise sachamuch ka koee mor jamin par, apani pachh failae baitha huaa ho. bada adbhut lagata tha vah mor. usi park se satakar, ek nadi bahati thi. usake kinare bade oonche oonche ped khade the aur pedon se hi satakar kafi lanbi chaudi jagah men, amarika men sadiyon pahale ke vahan ke aadivasi basindon kee jivanashaili dikhaee gaee thi. ve kis tarah ke foos ke gharon men rahate the unakee rasoee ke bartan, khatiya, bistar saman rakhane ke bartan shikar men upayog aane vale tir dhanush bhale barchhe, aurat mard aur bachche aur vahan se lekar yahan par, jab angrej aae to us samay se lekar mashinon ke aane tak unakee poori jivanashaili, ve kis tarah ke gharon men rahate the, unaka pahanava odhava sabako itane vistar men aur jivant dikhaya gaya tha ki use dekhakar lagata tha ki vah poora kalakhand hi hamari aokhon ke samane sajiv ho utha hai.

dalas se karib dedh sau kilomitar door, ek dainasor vaili hai. jahan par yah vaili hai yahan par ek chhota nala bahata hai. us nale ke pani ke niche dainasor ke panv ke kaee nishan patthar par spasht dikhaee padate the. ek doosari jagah usase chhota, lekin kafi chust aur khoonkhar doosara prani, jo dainasor ka shikar kiya karata tha, usake panjon ke kaee nishanon ke sath danasor ke pairon ke kuchh is tarah ke nishan vahan maujood the jisase vaigyanikon ne anuman lagaya hai ki shikari janavar, dainasor par hamala kiya hai aur vah apane pran bachane ke lie usase joojh raha hai.
bharat se kaee dafa, koee natak mandali ya valivud ke sitare amarika jate hain aur vahan apana program karate hain. main pahale samajhata tha ki aisa, donon deshon ke bich kalcharal programon ke aadan pradan ke tahat hota hoga lekin nahin, amarika men base kuchh bharatiy, samay samay par, yahan ke kalakaron ko moti rakam dekar, bulate hain aur unaka sho karakar usase achchhi kamaee karate hain. jis samay main amarika men tha usi samay dalas men ek natak mandali aaee huee thi. valivud kee abhinetree poonam dhillon us mandali men shamil thi. unake dvara abhinit natak bhi mainne dekha tha. natak khatm hone ke bad, logon men poonam dhallo ke sath foto khichavane aur khichane kee hod si lag gaee thi. main bhi unake sath khada hokar foto khichavaya tha.

jis tarah bharat ka samajik dhancha aur yahan kee jivanashaili melajol aapasi bhaeechare aur samoohikata ke tane bane par banaee gaee hai aur ham log mil julakar, jindagi ka jashn manate hain vaisa yahan nahin hai. yahan par do padosi varshon se agal bagal ke makan men rahate hain lekin donon men aapas men batachit shayad hi kabhi hoti ho. lekin unake is tarah kee jindagi jine ka matalab yah kataee nahin hai ki yahan ke log, nihayat svarthi, aatmakendrit niras aur khadoos kism ke log hote hain, ki unake jivan men vyang vinod aur hansi thaththa ke lie koee jagah hi nahin hai. yahan par, do aparichit aamane samane padate hain to ek doosare ka abhivadan jaroor karate hain aur mauka milane par ek doosare se hansi majak bhi khoob karate hain. ek din main apane bete ke sath, ghar ke lie koee saman kharidane ke lie valamart gaya huaa tha. saman se lada kart lekar, beta to bhugatan kauntar kee lain men khada ho gaya tha, aur main, usake aane ka intajar karata, kauntar kee doosari taraf, ek khali jagah dekhakar vahan khada ho gaya tha. jahan main khada tha vahan se, thodi hi door par ek doosara kauntar tha, us kauntar par ek kali aur behad moti lanbi, chaudi, aurat khadi thi jo logon ke saman palithin kee panni men dalane ka kam kar rahi thi. mujh par najar padate hi mera, daramiyana kad kathi aur apane mukabale, behad dubali patali meri kaya dekh, vah jor jor se apani tale thonk thonk kar, kisi pahalavan kee tarah apane se bhid lene ke lie mujhe lalakarane lag gaee thi. oonchi, aavaj men usaka mujhe lalakarana tale thonk thonk kar, munh mataka mataka kar aur aankhe chamaka chamakakar mujhe apane se bhid lene kee chunauti deti dekhakar vahan maujood log hans hans kar lot pot hue ja rahe the aur main sharm ke mare jamin men gada chala ja raha tha. isi tarah ek din main siti laibreri, kitaben lene gaya huaa tha. vahan se nikalane laga to kauntar par baitha staf, mujhe apane pas bula liya tha. usake samane, naee laibreri ka ek le aaut rakha huaa tha. usane mujhe bataya, ki yah laibreri, thode hi dinon men, ekadam naee aur badi bilding men shift kar jaegi. usaka le aaut yah hai, ise aap dekh rahe hain n? han main dekh raha hoon mainne svikar men apana sir hilakar use bataya tha. yah, yah, yahan par, meri sit hai aur yah, yah main baitha huaa hoon, dekh rahe hai n aap? apane dahine jhukakar vah mujhe, us leaaut ke frant men bane, ek kamare ke bhitar, kauntar par baithae, ek bahut chhote aakar ke gudde kee taraf, apani uaegali dikhate hue mujhase kaha tha yah main hoon, jab aap laibreri aaiega to mujhase jaroor miliega main yahin aapako, hamesha isi tarah baitha miloonga. us samay usakee deh se lekar, usake bolane ke andaj aur aavaj men jaisi masakhari thi us par main bina hanse nahin rah paya tha. yahan ke log mamooli se mamooli kam ke sampann hone par, us kam ko karane vale ke prati kritagyata ka gyapan jaroor karate hain. pablik ples men yahan par sigaret pina varjit hai. lekin jinhen sigaret pine kee aadat hai ve kisi dival ya khanbhe kee ot men, chhup chhupakar sigaret pite mil jat hai yadi us samay koee unake pas se gujar jata hai to, apani is ghrishtata ke lie ve usase kshama jaroor mangate hain. yahi par mainne dekha ki jo chij yahan mana kar di jati hai log usaka bakhoobi palan karate hain. shayad isi ke chalate mujhe amarika men aam jagahon men ekadh do logon ko chhodakar doosara koee sigaret pite kabhi nahin dikha tha.
kam, dham aur rojagar ke silasile men amarika pahunche bharatiy, bachchon ke bare men, bharat ke akhabaron men, jo bhi lekh aur kisse kahaniyan chhapati hain, usase unakee jindagi ke bare men, jyada janakari nahin milati thi. bachche agar vahan dukhi rahate honge to bhi, hamare poochhane par ve, use nahin bataenge, aur yadi apani pida unhonne hamen bata bhi diya to use sunakar dukhi hone ke siva, ham unake lie kuchh kar bhi nahin sakate the isalie apane bachchon se, is vishay men main kabhi jyada poochhaparakh nahin kiya tha. lekin ek dharana man ke bhitar to rahati hi thi ki jab ve parae mulk men naukari karane gae hain to vahan unakee haisiyat kisi deaayam darje ke nagarik kee tarah kee hi hogi. apani jad se katane kee tis, apani mati aur aatmiyon se vichhoh ka dard, apani sanskriti se door hone ka pachhatava jaisi baton ko lekar, yahan ke kisse kahaniyon men jo kuchh padhane ko milata tha usase bhi unakee jindagi, khushahal hone kee aashvasti nahin mil pati thi. lekin jab yahan aakar mainne amarikee sistam, aur yahan par base bharat ke hi nahin balki prithvi ke sabhi konon se pahunche bashindon kee jivanashaili aur khushahal tatha fikar nat jindagi dekha tha, to mera man khushiyali se bhar utha tha. bachchon ne yahan aane ka jo nirnnay liya tha usake lie, unake man men, kisi bhi tarah ka pachhatava jaisi bat mujhe kisi men bhi nahin dikhi, ulat isake, mainne, unamen jaisa aatmavishvas aur aatmasantushti dekha unakee khushahal aur nirdvandv jindagi dekhi, bina kisi ainth ya akad, ya dainyata ya hinata ke yahan kee mati par unakee vinamr aur pratishthapoorn upasthiti darj dekhi use dekhakar main unake bare men sirf itana hi kahoonga ki hamare mukabale ve jyada buddhiman aur paripakv hain. is sab se badhakar jo khas bat unamen mujhe dikhaee padi aur jise dekhakar garv se mera sina chauda ho gaya tha vah tha, yahan kee mati ke prati inaka samarpan. chahe koee, vark paramit ke boote yahan rah raha ho, grinakard holdar ho ya yahan kee nagarikata prapt kiya huaa ho, sabake sab, is dharati kee, apani hi, mati aur matribhoomi kee tarah kadar karane ke sath sath apani poori oorja buddhi, gyan aur kaushal se, isake prati poori tarah samarpit dikhe.

amarika men rah rahe apane bachchon ke pas, jab unake man bap pahunchate hain to yah bat, sirf usi bachche ke lie nahin, balki, usakee poori mitr mandali ke lie ek badi khushakhabari hoti hai. unake pahunchane ke bad, har ghar se, khane par, unaka aisa bulava aana shuroo hota hai, ki usamen unaka, har kisi ke ghar pahunch lena, mushkil ho uthata hai. kisi ka khud ka janmadin, to kisi ke bachche ka janmadin, kisi kee shadi kee salagirah to kisi ke yahan saty narayan kee pooja aur aise shubh maukon par koee bujurg aashirvad dene ke lie maujood ho, to to ise ve apana saubhagy samajhate hain. amarika pahunchane ke bad, khasakar shanivar aur itavar ke din, kahin n kahin, hamara bhi bulava rahata hi tha. unake ghar pahunchane par, jahan ek taraf mujhe, unaka aadar samman milata tha vahi doosari taraf ghar men taiyar bharat ke kone kone ke, svadisht aur lajij vyanjanon ka jayaka bhi mila karata tha. lekin is sabase badhakar unake ghar jane se, ek bada fayada mujhe yah huaa ki unake sath baithakar, unase baten karake, rajaniti, arthashastra, vigyan tatha samayik vishayon par unake bich kee bahasen sunakar tatha unake patni bachchon se lekar, rasoee tatha unake sare parivesh ka bade najadik se dekhane parakhane ka, mauka bhi milata tha. amarika pahunchane ke bad, pahale din, jis ladake ke ghar, mera saparivar bulava tha vah, ladaka mere hi shahar ka tha. kafi lanba chauda do talle ka usaka makan (yahan ke do talle ke makan dayoopleks kee tarah ke hote hain, jisake oopar aur niche ke donon talle bhitar kee ek sidhi se jude hote hain, aur samooche ghar men ek hi parivar rahata hai.) kafi khoobasoorat tha. us din vah, apane bachche ka janmadin mana raha tha. is mauke par, usake yahan, sath sattar kee tadad men aurat mard aur bachche jute hue the. yahan par aise maukon par bachchon ke khelane aur dhamachaukadi machane ke lie har ghar men kafi lanba chauda ek gemaroom bana hota hai. jitana bada vahan logon ka jamavada tha use dekhakar, main yahi soch raha tha ki, is ghar kee malakin bechari, ko parti kee sari taiyariyan karane ke sath sath, roghane pakane jaisa rasoee ka kam bhi karana pada hoga aur isake lie use, do tin din pahale se hi der rat tak jagana pada hoga, jisake chalate vah is samay thakakar choor ho chukee hogi. lekin thodi hi der bad, jis roop men vah apane ghar ke bade hal men prakat huee thi use dekhakar main hairan rah gaya tha. banarasi sadi men, kisi naee naveli dulhan kee tarah, saji vah ekadam taji aur chust thi tatha apane mehamanon se chahak chahak kar mil, batiya rahi thi. bachche ghar ke bade gemaroom men uchhal kood tatha ghamachaukadi men mashagool the. puroosh ghar ke hal men sofa aur kursiyon par lade pasare aapas men, gappen lagane men jute hue the, aur naee umr kee khoobasoorat ladakiyan, jo in ladakon ko byahakar, unake sath yahan aaee hai, sab, bharat ke khoobasoorat paranparik libas men pariyon kee tarah saji guji, rasoee men juti huee thin. rasoee men ve kuchh bhoonj paka nahin rahi thi balki khane kee mej se lekar, parose jane vale vyanjanon ko rakhane aur sajane ke kam men juti huee thi. jab kisi kam men, samooh juta hota hai, to vahan hota yah hai ki, usi samooh ke bich se, koee siniyar ya kam ka janakar, samooh kee kaman sanbhal kar sare logon ko apane nirdesh men le leta hai aur usake nirdesh par, samooh ke sabhi log kam karate hain lekin rasoee men juti ladakiyon men, n koee siniyar thi n jooniyar, n hi koee unakee neta thi. ve sabakee sab chaukanni thin aur jise jo kam dikhaee padata tha, aage badhakar use kar liya karati thin. kam ke prabandhan ka unaka yah ekadam naya aur anokha sistam dekhakar main unakee samajh, aur usake anoothepan par mugdh tha. jab sare vyanjan tebulon par saj gae the aur main plet aur chammach ke sath khane par pahuncha tha aur vahan dal, chaval, kaee tarah kee sabjiyan, poodi, kachaudi, birayani, dahi rasagulle, salad, papad, chatani, khir pulav tatha doosare kaee tarah ke pakavan, tebul par kataron men saja dekha, to use dekhakar main hairan rah gaya tha. inhen banane ke lie usane koee kaitarar bhi nahin rakha tha aur tebul ke sare ke sare vyanjan shuddh bharatiy the, jinhen aardar dekar yahan ke kisi hotal ya restara se banavaya bhi nahin ja sakata tha aise men itani badi tadad men, aur vah bhi tarah tarah ke pakavan aur vyanjan, yahan sanbhav kaise huaa? yah bat janane kee, mere man men badi jigyasa thi lekin apani is jigyasa ko main apane bhitar hi dab gaya tha. tebul par maujood sare vyanjan bade lajij the. main jis samay unhen svad le lekar kha raha tha usi bich, makan kee malakin, apane pati ke sath, ek plet men gud ke do tin dhele aur ek doosari plet men, mirchon ka bharavo achar lakar hamare samane rakh diya tha. ankal ji, yah sirf aap donon ke lie hai. main unake sabhi geston men, sabase speshal aur pratishthit gest tha isalie mujh khas ke lie, donon apana sabase aham aur khas, jise yahan ke bachche sat talon ke bhitar chhupakar rakhate hain aur use kisi ke samane parosane ko kaun kahe, najar se use dekhane tak nahin dete, use ve lakar hamare aage rakh die the. ise aap khaie, ankal, yah gud, mere ghar ka bana hai aur mirch ka achar meri man ne banaya hai. aisa nahin hai ki gud aur mirch ka achar yahan milata hi nahin. yahan ke indiyan stor men, vah sab kuchh milata hai jo bharat ke storon men milata hai lekin ghar ke gud men, jo vahan kee mati ka ras aur gandh rachi basi hoti hai aur man ke hathon ke bane achar men, jo mamata aur vatsaly undela huaa hota hai vah bajar ke gud aur achar men kahan se milegi. isi ke chalate vah unake lie, kisi badi nidhi kee tarah ka hota hai aur us nidhi men se, donon men se, yadi koee, nikalakar, kisi doosare ke samane parosane kee ghrishtata kar diya, to isakee shikayat ham logon kee adalaton tak pahunch jati hai. hamari adalat tak to yah shikayat tak pahunchati hai ki ghar ke bane aam ke achar kee fok choosane chichorane ke bad, jab usake reshe aur aothi ekadam niras hokar sirf usaka siththa bachata hai to bhi ve use fenkate nahin balki use bhi khoob chabakar nigal jate hain.
(kramashah agale ankon men jari...)

No comments:

Post a Comment

Desitoonz