Posts of Blog rachanakar

narendr nirmal kee kahani : tare jamin par ka bechara pappoo

Posted: 23 Dec 2008 05:54 PM PST

kahani

tare jamin par ka bechara pappoo

- narendr nirmala

bachapan se hi sharmila kism ka insan. ladkiyan to door ladkiyon ke shabd se bhi sirahan si hone lagati. dost kaee sare hue magar sabhi saman ling vale. isaka kadapi matalab nahin kee usamen 'dostana' vale lakshan shamil the, balki vah abhi nabalig tha. dasavin tak yahin daur chala. padhaee men bhi kuchh khas n tha. avval aata parantu pichhe kee talika se. gharavale bhi kafi pareshan rahate. khel khelana bhi pasand nahin karata. agar man men kabhi khel bhavana hichakole bhi marati to gharavale tana dete. har vakt khel, isalie to padhaee men avval aate ho vah bhi pichhe kee disha se. tumhara to ab bhagavan hi malik hai. tane sunata raha tulana auron se hoti rahi. dekho us samir ko farst laya hai apane bap ka nam raushan kiya hai. dard asahaniy hota gaya. man men kshobh janm lene lage. bechara tha... pappoo hi raha. dasavin ke parinam ne ek bar fir se nirasha ke andhere men dhakel diya. lekin ghar men ek man thi jisane har vakt puchakara, galatiyon par parda dalati rahi. janati thi, vah bhi usakee kokh se janma usake kaleje ka tukada raha. us bechare kee tarafadari men kabhi-kabhar aakshep ke dansh ko bhi hansakar sahan karane se n katarati. man jo thahari, vishal hriday hona to lajami hi tha. bap kee tarah patthar dil kee sanskriti hamare bharatiy sabhyata men nahin dekhi gaee hai. aur apani hi chhavi ko dhoomil hota dekh kaha chup rah pati.

dasavin ke bad kisi prakar use modarn skool men dal diya gaya. taki sankuchit mastishk men padi dhool chhat sake. is dauran use prem ka matalab pata chala. aakarshan kise kahate hai, bodh hone laga. ek ladkee se man hi man pyar karane laga. bechara sharmila jo thahara. kahane kee himmat kaha thi. lekin ek bat to usamen thi ki vah apane sabhi baton ko bedhadk doston ko kah deta. use shahar kee hava bhi nahin lag paee thi. kyonki jahan vah rahata tha use ganv kaha jata. ganv kee sanskriti men pala-badha jahan har padosi men rishte-nate talash leta. kisi ko chacha-chachi, mama-mami, didi-bhaiya aur bahan bana leta. aur ek bar jo man men bitha leta, door-door tak us par kudrishti nahin dalata. lekin jahan vo padhane ke lie modarn skool jata tha. aas-pas ka vatavaran shahar ke mahaul men poori tarah dhal chuka tha. samane khulane vale daravajon ke bich rishte to door kee bat, ek-doosare ko janate tak nahin. anajane musafir ko ghar talashane men bhi kafi mashakkat karani padti thi.

ghar se nikalata skool bas par aur sandhya ko sidha usi ganv ke vatavaran men. usane pyar to sikh liya par pyar ke alava kuchh nahin sikha, jo aaj ke mahanagaron ke bachche kaksha satavin se hi jan chuke hote hai. n to ladkiyan rijhane ke taur-tarike se hi vakif tha, usake bad kee parikalpana kee to bat hi chhod den.

isi kram men bechare kee do sal bhi gheesa-pita bit gaya. aur hona kya tha, barahavin ka parinam samane. parivar valon ka shor kanon men laudaspikar kee tarah ek bar fir bajane laga. isaka kadapi tatpary nahin ki vah fel ho gaya tha. balki pratham se do ank pichhe rahakar dvitiy shreni ka khitab to avashy hi pa liya tha. sab ne kahan ab kya karoge? usane kahan taiyari medikal kee karoonga, shayad daktar ban jaoon. konafidens looj jo thahara. medikal kee taiyari ke lie koching men dakhila liya par usakee ajibo-garib si padhaee ne use aur asamanjas men dal diya. yah bhi ek sal yoo hi jata raha. ek bat avashy rahi is bar use prem ka moh man men nahin panap paya.

nirash laut aaya ghar ko khud ko kosate hue. parivar valon ne kosa, vo alag. padhaee se mano ab man hi uchat gaya tha. bijanas men jane ka man bana liya. ghar valon ne bhi protsahan dene ke bajay ek bar fir se padhaee kee dal-dal men jhok diya. kahan abhi padho bijanas karane kee umr abhi bahut bachi hai. pas ke kalej men dakhila liya taki snatak kee khanapoorti ho sake. isi bich bechare ko dilli ghoomane ka mauka mila. vahan kee daudti bhagati jindagi se kafi prabhavit huaa. roj nae-nae husn ke darshan aur usase panapate aakarshan ne dilli men rahane kee lalak jaga di. dilli men rahana koee aasan nahin tha. mahanga shahar tha. vo dakshata bhi nahin thi jisase kee vah khushahal jindagi apani bana sake. lekin achanak usake jehan men kaee sare rangin sapanon ne jagah banana shuroo kar diya. man se ek aagaj uthane laga, kahane lagah-

''desh ke lie kuchh karoon ya to nam kamaoon

rajaniti me nahin to tivi par to aaoon

vo bhi n kar saka to main mitti men mil jaoon''

jindagi men aage chalakar use kya karana hai. kuchh nahin janata bas itana janata 'jo man men thani hai, use har keemat par pana hai'. aise men rojagar parak kors ke vichar manthan chalane laga. sath hi man kee aavaj ko bhi poora karana tha. patrakarita ek matr rasta dikha jisake madhyam se in tamam raston se gujara ja sakata hai. lekin kuchh kamiyan usamen jisase is raste par aana aasan nahin dikh raha tha. lekin kahate hai n jo kismat men likha hai vahin hota hai. achanak usake hathon men likhane kee kshamata jagrit hone lagi. shuruaat bechare ne kavitaon se kee. isi bich ek ladkee ke pulakit chehare ne usakee aakhon men dastak di. fir kya tha prerana ubal marane laga. kalam kee, dhar dharadar hoti chali gaee. raftar bhi tej hoti gaee likhane kee. shabdon aur vakyon se khelane kee kala men bhi nikhar aane laga. han ek kami thi usamen sahityik shabdon ka istemal nahin kar pata. vajah ek matr thi, vo ganv, jahan hindi bhi shuddh nahin boli jati thi. kyonki pradeshik bhasha ka bol-bala tha.

usane tay kar liya patrakar hi banega. chahe kitani bhi pareshaniyon ka samana karana pade. ladega vo thakega nahin. snatak pas kar liya vah bhi pappoo kee tarah latak-jhatak kar. lekin patrakarita ke snatakottar men dakhila lene men jyada mashakkat nahin karani padi. dakhila lene ke bad usane tay kiya ki vah ab apane sharm ko apane dil ke kone men bane sandook men dal dega. aisa hi kuchh kiya. fir kya tha doston kee katar badhane lagi. is bar ladkiyan bhi us katar men shamil hone lagin.

apani kaksha men avval rahane v banane kee jid men usane lekhan men kaee kary kiye. apana kalatmak soch men bhi tikshnnata lata gaya. kalej men hone vale karyakramon men bhi badh-chadhakar hissa lene laga. ladkiyon ke sath bhi khil-khilakar hansane kee kala sikh li thi usane. is bich apane hi kalej se prakashit hone vali pustak ka sampadan kiya. kaee sare lekh aur kavitaen unamen dale. isi bich sahapathi kanya ka dil men dastak dena aarambh huaa. dono men fauran achchhi dosti bhi ho gaee. lekin bechar fir pappoo ban gaya kyonki ladkee sharmili thi. aur thodi kasar usane bhi poori kar di. n udhar se is pyar ke aag ko hava di gaee aur n hi usamen itani himmat thi ki aag men ghee dal sake. han baton-baton men muhavaron se jaroor samajhane ka prayas kiya parantu vifal raha. ek din himmat kar usane sab kuchh kahana chaha to usase pahale hi pata chala use koee aur pyar karata tha. itana hi nahin us shakhs ne dhamakee de rakhi thi, agar tune bevafaee kee to aatmahatya kar loonga. vo bechara soch men pad gaya. kisi kee jan se jyada usaka pyar keemati nahin ho sakata. usane fauran use dil se nikal diya. dosti rakhi par vo ehasas khatm kar diye, jisane usake dil ko vichalit kar rakha tha. fir kya tha dil khali kahan rahata hai vah bhi umr ke aise padav men. talash to sabako rahati hai apane lie ek sathi kee.

in ek salon men vah dilli kee sanskriti se poori tarah avagat ho chuka tha. ki yahan sachche pyar kee koee kadr nahin hai. sab paise ke bhookhe hai. har jism kee keemat hoti hai yahan. lekin use jism se jyada ek sathi kee talash thi. taki usake kami ke ehasas ko bhar sake. lekin nakamayab rah gaya. tab tak sal bhi bit chuke the. vah registan men tadpate pyase kee tarah pyar ke lie pyasa hi rah gaya. aaj vo naukari kee jugat men idhar-udhar bhatak raha hai. jis patrakarita ke dam par usane samaj men faili buraeeyon ko mitane ka bida utha rakha tha. aaj usi patrakarita ke badale svaroop jisamen jativad, kshetravad, bhaee-bhatijavad aur bajaravad ke badhate chalan ne kafi nirasha pahuncha hai. vah samajh chuka hai ki patrakarita apani purani dhara kho chukee hai. jisake ufan matr se hi bade se bade chattan dhool men parinnat ho jate the. balki vaishvikaran ke is yug men yah bhi ek khoobasoorat rangin lifafe kee tarah dikhata hai. samay ke takaje ko bhanpate hue ab usane bhi khud ko badalane ka faisala kar liya hai kyonki akela chana bhad nahin fod sakata. is badali huee paristhiti men naee soch ke sath khud ke lie mukammal sthan pane ka prayas usaka jari hai. dekhana hoga aane vale dinon men vah kitana safal ho pata hai.

is bich use maloom chala kee usaka pahala sachcha pyar, jise kisi ke aatmahatya kee dhamakee ne usake ehasas tak mitane ke lie vivash kar diya tha. usakee mang ab sajane vali hai. hathon men menhadi rachane ja rahi hai par vah bhi kisi aur se. lekin ek badi aashchary karane vali bat samane aaee ki vah us pappoo se pyar karati thi, lekin use kabhi kahane kee himmat nahin huee thi. aise men ek bat avashy samane aati hai ki bechare ladke ko pappoo kee sangya di jati hai. lekin un ladkiyon ka kya nam diya jae jo pappoo vali harakaten karati rahati hai. vichar kare!

------

narendr nirmala

ke- 10, dvitiy tal, shakarapur, dilli

mo.- 9868033851